ألو

41836 ؟
- أيوه يا فندم
- صحيح الكتور صبرى منصور وزير التموين السابق اعتقل ؟
- لا يا أفندم ...
- يعنى الكلام اللى سمعناه غلط ؟
- من غير شك ، والدليل على كده ، ان الرئيس محمد نجيب راح زاره فى بيته ، والوزير السابق رد له الزيارة فى الرياسة ! وتنتهى المحادثة التليفونية ...

 

 

 

 

لماذا اعتكف نائب الرئيس ؟

-الو 41836
- أيوة يا فندم
- صحيح البكباشى جمال عبد الناصر نائب الرئيس ووزير الداخلية استقال ؟
- لا يا فندم !
- انما ده معتكف فى البيت .. والناس بتاكد أن الاعتكاف فى عرف السياسة ، يعنى اشمئناط .. والاشمئناط يسبق الاستقالة ببضع ساعات!
- أسلوب الاعتكاف ده كان زمان ... والبكباشى جمال عبد الناصر ، شعر يوم الخميس بألم شديد فى الامعاء ، ولما راح المستشفى العسكرى ، اتضح ان عنده اشتباه فى المصران الاعور ، ومع ان الاطباء نصحوه بالراحة التامة ، الاانه حضر صلاة الجمعة مع الرئيس ثانى يوم .. لكن التعب زاد عليه بعد كده ، وارتفعت حرارته ، واضطر لاستدعاء الاطباء مرة ثانية .. وكشف عليه الدكتور عجرمه والدكتور مظهر عاشور والدكتور يوسف عز الدين ، وقرروا ان عنده اشتباه مصران أعور ،ولازم يستريح .. والرئيس زاره فى بيته مع أعضاء مجلس الثورة بعد نص الليل .. وعلى كل حال بكره راح تعرفوا انه راح مكتبه فى وزارة الدخلية .. وتنتهى المحادثة التليفونية ...

 

 

 

فاروق فى " الارنص " !

- الو41836 ؟
- أيوة يا فندم ...
- أيه الحكاية دى ؟
- حكاية ايه ؟
- بيقولوا ان الانجليز جابوا فاروق من أوروبا وحطوه فى معسكراتهم فى فايد ؟ ...
- سمعت الكلام ده منين ؟
- من واحد بيشتغل فى " الارنص " بيقول انه شافه هناك ...
- أوعى تصدق .. كل ده كلام فارغ .. فاروق فى باريس .. وعدد الانجليز فى القتال لم يزد
- طيب أزاى تسيبوا الجماعة اللى حرقوا القاهرة فى 26 يناير ، يحرقوا الريف الجمعة اللى فاتت ؟
- مش صحيح .. ثبت فى التحقيق ان الحرائق وقعت بسبب اهمال غير متعمد .. زى أى حادث أخر من حوداث الحريق فى الارياف !
- أمال ابه الكلام اللى بنسمعه ده ؟
- وتفتكر الخونة عندهم ايه دلوقت غير الكلام ؟!
- وتنتهى المحادثة التليفونية ...  

 

 

 

 

 

فكرى أباظة ينتحر !

- الو 41836؟
- أيوة يا فندم ..
- ايه حكاية الاستاذ فكرة أباظه ؟
- ماله ؟
- ازاى تخلوه ينتحر مع انه راجل طيب وابن حلال ، ووطنى قديم ، وعلى وش دنيا ؟
- مين قال الكلام ده ؟
- كل الناس بتقول انه كتب فى " المصور " العدد اللى فات انه اذا ما كانش راح يسافر أوروبا السنة دى راح ينتحر !
- وبعدين ؟
- وبعدين لازم انتحر !
- على كل حال احنا ما بلغناش حاجة !... ويمكن تتصل بنمرة 20610 وتعرف منها مصير الاستاذ فكرى أباظة .. وأحب أن أوكد لك من دلوقت أن الكلام ده مش تمام !
- وتنتهى المحادثة التليفونية ...

 

 

 

- الو 41836؟
- أيوة يا فندم ..
- ايه الحكاية ؟
- حكاية ايه ؟
- ازاى كريم ثابت يتعين رئيس تحرير جريدة " التحرير اليومية " ؟
- مين قال الكلام ده ؟
- مجلة التحرير نشرت ان واحد صحفى قديم ، وباشا سابق ، راح يعين رئيس تحرير الجريدة اليومية ، التى تنوى الهيئة اصدارها .
- ويعنى مفيش صحفى أقدم من كريم ثابت ، ولا باشا سابق غير كريم ثابت ؟
- أمال يبقى مين ؟
- عندك مثلا فكرى اباظة .. عندك الكتور صلاح الدين .. عندك الكتور طه حسين .. عندك الدكتور هكيل .. فيه كثير قوى .. ومش ضرورى يكون واحد من دول .. ومش ضرورى طبعا يكون كريم ثابت ...
- وتنتهى المحادثة التليفونية ...

 

 

المخدرات والطابور الخامس

وهكذا لا تكاد تمر دقيقة واحدة ، حتى يدق تليفون هيئة التحرير ، رقم 41836 ، وتلتقط أسلاكه شائعة جديدة ، بأسلوب جديد .. وما أكثر الشائعات فى هذه الايام ! ولكن ماهو مصدر تلك الشائعات ؟ انهما مصدران .. المصدر الاول هو نفر من العابثين الماجنين ، الذين لا يهمهم من الدنيا غير الضحك والتهريج ، ولو كان فى ذلك ضرر بأنفسهم وذويهم وأوطانهم ، هؤلاء فى الغالب من ضحايا المخدرات ... و المصدر الثانى هم جماعة الطابور الخامس ، التى تضم نفرا من الحانقين على العهد الجديد ، الذى سلبهم أدوات الظلم ، التى كانوا يشهرونها فى وجوه البؤساء ، ويختطفون منهم أقواتهم وانسانيتهم ... وهؤلاء يحاولون عبثا أن يزعزعوا ايمان الناس بالحركة ورجالها المخلصين الاحرار ... طمعا فى عودة أيام زمان .. أيام الفوضى والظلم وسوء النظام ! وكل شائعة ، بل كل نكته تقال هذه الايام ، تصل سريعا الى أسماع رجال الحركة ، ويعرف تماما مصدرها وقائلها وطابعها وناشرها ... ولكنهم يعملون أذنا من طين وأخرى من عجين ... ولكن الى حين ! ويقوم على محطه أستقبال الشائعات ، الصول على محمد زهران ، وهو شاب لبق ، يعرف كيف يقضى على الشائعة فى مهدها ... بالتليفون !

 

 

لخزينة أفلست !

وهناك شائعات كثيرة ، يتلقاها التليفون رقم 41836 ، وكلها تدل على انها صادرة من عقول مجدبة مخرفة ، يخونها التوفيق حتى فى حبك الشائعة ومن تلك الشائعات أن السبب فى أزمة قمر الدين التى حدثت فى شهر رمضان ، هو أن الجيش قد استولى عليه ، ووزعه على وحداته ، وأن الخزينة المصرية قد أفلست ، حتى تعذر صرف المرتبات للموظفين ، واضطرت الدولة الى الاقتراض من البنك الاهلى ،وأن الاوامر قد صدرت الى أعضاء لجنة الدستور ، بالكف عن العمل ، حيث أصبح العهد الجديد ينادى بأنه " لا أحم ولا دستور " .. ومن هذا كثيرا أن الشائعات سهام مسمومة لا يوجهها المغرضون الى النظام القائم وحسب ، وانما يريدون بها طعن كل مصرى مؤمن بمصريته .. فى الصميم اتصلوا بتليفون 41836 .. بمجرد سماع أى شائعة ، فتؤدوا بذلك خدمة لأنفسكم ولوطنكم ...

 

كتب بواسطة محمد المهندس (Guest)

كتب بواسطة هذا البريد محمى من المتطفلين , تحتاج إلى تشغيل الجافا سكريبت لمشاهدته (Guest)

كتب بواسطة هذا البريد محمى من المتطفلين , تحتاج إلى تشغيل الجافا سكريبت لمشاهدته (Guest)